Տաթևի վանական համալիրը՝ հայ միջնադարյան ճարտարապետության փայլուն օրինակներից մեկը, վեր է խոյանում Սյունիքի մարզի Տաթև գյուղում՝ Որոտան գետի աջ ափին։ Այն ոչ միայն ճարտարապետական գլուխգործոց է, այլև բազմաշերտ նշանակություն ունեցող հոգևոր, կրթական, մշակութային, գիտական ու երբեմն՝ նաև ռազմավարական կենտրոն։
 

Խնձորեսկի ճոճվող կամուրջը գտնվում է Սյունիքի մարզի Խնձորեսկ գյուղում: 
Կամուրջի երկարությունը 160 մետր է, բարձրությունը՝ 63 մ, քաշը՝ 14 տոննա։ Կամրջով միաժամանակ կարող են անցնել միջին քաշ ունեցող մոտ 700 մարդ։ 

Արենիի քարանձավը  քարանձավային համալիր է Վայոց ձորի մարզի Արենի գյուղում՝ Արփա գետի ափին։ Հայտնի է նաև «Թռչունների քարանձավ» անվանումով։ 2010 թ-ին այստեղ հայտնաբերվել է աշխարհի ամենահին կոշիկը՝ 5500 տարեկան։ Քարանձավը բաղկացած է 3 սրահներից։ 
 

Շաքիի ջրվեժը գտնվում է Սյունիքի մարզում՝ Սիսիան քաղաքից մոտ 3 կմ դեպի հյուսիս-արևմուտք, Շաքի գետի վրա, որը Որոտանի վտակներից մեկն է։ Ջրվեժի բարձրությունը շուրջ 18 մետր է։ Այն իրավամբ համարվում է Հայաստանի ամենագրավիչ և այցելվող տեսարժան վայրերից մեկը։ Ջրվեժը հիացնում է ոչ միայն իր թափանցիկությամբ, այլև նրան շրջապատող վայրի բնությամբ։