Սանահինի վանական համալիր գտնվում է Լոռու մարզում՝ Ալավերդի քաղաքից հարավ, Դեբեդ գետի աջափնյա բարձրադիր սարահարթի վրա։ Ըստ վարկածներից մեկի՝ «Սանահին» անունը նշանակել է «սա քան զնա հին»՝ Հաղպատի հետ համեմատությամբ։ 10-13-րդ դարերում Սանահինը եղել է հայ միջնադարյան հոգևոր, մշակութային և կրթական կյանքի խոշոր կենտրոն։

Ախթալայի վանքը Լոռու մարզում գտնվող հայկական միջնադարյան ճարտարապետության բացառիկ նմուշներից է։ Կառուցված լինելով 10-13-րդ դարերում՝ վանքը հայտնի է իր հրաշալի պահպանված որմնանկարներով, որոնք աչքի են ընկնում վառ գույներով և մանրամասնությամբ՝ համարվելով տարածաշրջանի լավագույններից։ 

Լոռու մարզի Ալավերդի քաղաքի մոտ, Սանահին-Սարահարթ ճանապարհին է գտնվում խորհրդավոր Մենձ Էր քարայրը։ Ենթադրվում է, որ այստեղ ապրել են  նախամարդիկ, իսկ հետագայում դարձել է թաքստոց, ավելի ուշ՝ այծերի փարախ։ Քարայրից բացվում է Լոռու հեքիաթային տեսարանը՝ զմրուխտապատ լեռներ, վեհաշուք Լալվար, անտառներ ու դաշտավայրեր։ Ներքևում փռված է Ալավերդի քաղաքը։